Guðmundur "Muggur"Pétursson Thorsteinsson

1891 - 1924  (32 ára)

• Fornafn	Guðmundur Pétursson Thorsteinsson  [1, 2]
  Gælunafn	Muggur
  Fæðing	5 sep. 1891	Bíldudal, Íslandi   [3]
  		Otradalsprestakall; Prestsþjónustubók Otradalssóknar 1850-1896, s. 152-153
  Andlát	26 júl. 1924	Søllerød Sanatorium, Søllerød, Rudersdal Kommune, Region Hovedstaden, Danmark   [2, 3]
  	Ástæða: Lést úr brjóstveiki (berklum).
  		Statens Arkiver - Kirkebog Københavns amt, Søllerød Sogn, Kontraministerialbog (1818-2003), Døde mandkøn 1924-1941, opslag 4
  Greftrun	12 ágú. 1924	Hólavallagarði við Suðurgötu, Reykjavík, Íslandi   [1]
  		Guðmundur Pétursson Thorsteinsson Plot: B-22-11
  Nr. einstaklings	I15650	Legstaðaleit
  Síðast Breytt	19 júl. 2024

  
  

• Athugasemdir

  Guðmundur Pétursson Thorsteinsson, eða Muggur, fæddist á Bíldudal 5. sept. 1891. Hann var sonur hjónanna Péturs Thorsteinsson og Ásthildar Guðmundsdóttur, en Pétur rak þilskipaútgerð og verslun á Bíldudal. Þau hjón áttu 10 börn, fyrst komu 6 dætur og þá 4 synir en Muggur var elstur þeirra. Hann ólst upp í glöðum systkinahóp í einhverju mesta ríkidæmi sem þá var á Íslandi en það hefur að líkindum haft mikil áhrif á skaplyndi hans. Aldrei kom annað til greina en að Muggur færi í listnám. Fjölskyldan flutti búferlum til Kaupmannahafnar 1903. Þar nam Muggur við Teknisk Selskabs Skole, en jafnframt náminu var hann mikið á faraldsfæti, ferðaðist vítt og breytt um Danmörku og suður um Evrópu og drakk í sig strauma og stefnur í listalífinu þar. Árið 1910 fluttust foreldrar hans aftur til Íslands, nú til Reykjavíkur, en Muggur hélt áfram námi sínu í Danmörku. Að loknu námi við Teknisk Selskabs Skole tók við nám í Konunglegu Akademíunni. Muggur bregður sér þó heim einn veturinn, fer út til Eyja og dvelst þar í tvo mánuði og málar og teiknar. Þaðan vestur í Dali þar sem hann dvelst sumarið og síðan enn út til Hafnar til að ljúka skólanum. Þannig var hin skamma ævi Muggs, hann var stöðugt á faraldsfæti, stöðugt að uppgötva eitthvað nýtt. Muggur var afar sérstæður, bæði sem persóna og listamaður. Hann var það sem kallað er "bóhem", honum var ósýnt um veraldleg mál eins og t.d. fjármál og hann undi aldrei lengi á einum stað í einu. Hann sinnti ýmsum tegundum myndlistar öðrum en málverkinu og raunar var honum sýnna um margt annað en að mála olíumálverk. Hann saumaði mikið út, sömuleiðis gerði hann klippimyndir og eftir hann liggur töluverður fjöldi teikninga gerðar eftir þjóðsögum. T.d. gerði hann myndröð við þjóðsöguna Sálin hans Jóns míns, og margir þekkja ævintýrið Dimmalimm eftir Mugg. Árið 1917 kvæntist Muggur danskri stúlku, Inger Naur. Það hjónaband stóð stutt, en vinskapur var ævinlega milli þeirra. Muggur lék fyrir atbeina Gunnars Gunnarssonar rithöfundar aðalhlutverkið í Saga Borgarættarinnar (Ormar Örlygsson), en sagt er að sú atvinna hafi lítið átt við hann. Muggur kenndi sér ungur berkla og lá inni á Vífilsstöðum mest allt árið 1923, en í október sigldi hann til Cagnes í Frakklandi í von um betri heilsu í sumar og sól. En veturinn varð harður í Frakklandi og í byrjun árs 1924 er hann lagður inn á sjúkrahús í Nizza. Um vorið heldur hann áleiðis til Íslands, mjög veikur, en kemst ekki alla leið og lést hann þann 27. júlí 1924 á Søllerød Sanatorium í Danmörku, tæplega 33 ára að aldri. Vinir hans bjuggu um lík hans og sendu heim með Gullfossi. Muggur hvílir í Hólavallagarði við Suðurgötu og á leiði hans situr sérstæður og fallegur legsteinn sem danski listamaðurinn Elof Risebye gerði og gaf, en á steininum er mósaíkmynd gerð eftir einni teikningu Muggs. [4, 5, 6]

  
  

• Ljósmyndir

  Muggur og kona hans, Inger. Myndin er tekin á þaksvölum hússins Laufásvegur 46.

  
  

  Skjöl

  Minnisvarði á leiði Guðmundar Thorsteinsson málara

  
  

  Sögur

  Íslensk ættarsaga - Ætt Bíldudalskóngsins Eftir: Guðjón Friðriksson

  
  

  Andlitsmyndir		Guðmundur Pétursson Thorsteinsson Muggur um 1919.
  		Guðmundur Pétursson Thorsteinsson Muggur í Cagnes 1924. Síðasta ljósmynd sem til er af honum.




• Kort yfir atburði		Fæðing - 5 sep. 1891 - Bíldudal, Íslandi Greftrun - 12 ágú. 1924 - Hólavallagarði við Suðurgötu, Reykjavík, Íslandi  = Tengill á Google Earth
  Skýringar á merkingum	: Heimilisfang       : Staðsetning       : Bær/Borg       : Hreppur       : Sýsla       : Land       : Ekki stillt

  
  

• Heimildir

  [S1] Gardur.is. [S249] Statens Arkiver, Kirkebog Københavns amt, Søllerød Sogn, Kontraministerialbog (1818-2003), Døde mandkøn 1924-1941, opslag 4. [S2] Íslendingabók. [S383] Þjóðlíf, 01.05.1991, s. 41. [S321] Ísfirðingur , 11.12.1991, s. 18. [S31] Morgunblaðið, 10.03.2002, s. 20-21.